القائمة الرئيسية

الصفحات

الامتحان عالبواب... شو بدنا نعمل وكيف ؟

أوراق-تك الامتحان عالبواب

الامتحان عالبواب... شو بدنا نعمل وكيف ؟


الامتحان عالبواب وفترة الانقطاع بلشت...
كيف بدنا انظم وقتنا؟
وكيف بدنا نبلش؟
كيف بدنا نحفظ وما ننسى؟
كيف بدنا نلحق المنهاج؟
هي الأسئلة كلها بلشت اتدور براس طلاب التاسع والبكالوريا.

ونحنا هون رح نجاوبكون عليها سؤال سؤال:

السؤال الأول: كيف بدنا انظم وقتنا؟

- لازم نبعد عنا كلشي بيلهينا عن دراستنا لما بنكون قاعدين عم ندرس متل الموبايل، يعني مو نحطو قدامنا ونعملو صامت هادا الشي ما بكفي لأن لازم نعملو عالوضع الصامت ونضبو بالخزانة أو بمكان بعيد.
- تزبيط جدول دراسي من أول يوم بالانقطاع لنهاية الامتحان، وتحديد الأهداف لكل يوم شو بدنا نحقق فيه، وأكيد ما ننسى نحسب حساب طاقتنا وقدرتنا على تحقيق الشي اللي حددنا، يعني مثلا ما نحط أنو بيوم واحد رح نخلص مادة الجبر هالشي صعب وهيك منكون حملنا نفسنا فوق طاقتنا وصرنا نحس بالاحباط من أول يوم لأن ما قدرنا نحقق هالشي.
- نعطي أولوية بحياتنا للاحتياجات الأساسية متل النوم والأكل لأن بلا النوم الكافي والأكل الجيد رح يضعف جسمنا وما نقدر ندرس ونركز بشكل جيد.
- نخصص وقت كافي لنرتاح فيه لحتى يساعدنا عالتركيز وما نتعب وما نحس بالملل، يعني ممكن ناخد راحة قصيرة كل ساعة أو ساعتين، وما نوصل عدد ساعات الدراسة الطويلة مع بعضها، ونلعب شوية رياضة لحتى يتحرك الدم بشكل منيح وتتنشط الدورة الدموية ونتخلص من التوتر.

السؤال الثاني: كيف بدنا نبلش دراسة؟

وقت بدنا نعمل البرنامج الأحسن نبلش من آخر مادة لأول مادة وهيك ما منضطر نعيد المادة الأولى مرتين وتاخد وقت زيادة، وكتير كتير مهم انخصص لكل مادة الوقت اللي بتحتاجه واللي بناسب قدرتنا.
وبدنا نمشي مادتين مادتين ليش؟ لأن إذا بدينا بمادة وحدة رح نمل، وإذا حطينا أكتر من مادتين ممكن نتشتت عن التركيز وما عد نجمع، لذلك المادتين هو الحل الأنسب للتركيز وعدم الملل.

السؤال الثالث: كيف بدنا نحفظ وما ننسى؟

أول شي لازم نعزز ثقتنا بنفسنا ونقول نحنا منقدر ورح ننجح ونحقق يلي بدنا ياه، هي الرسائل الايجابية ضرورية لعقلنا.
تاني شي الانتباه للفهم قبل الحفظ من بداية الدراسة، فلازم نفهم منيح لنقدر انرتب طريقة الحفظ ونقدر نستحضر يلي حفظناه.
تالت شي: محاولة ربط الفقرات بأشياء من الواقع والحاضر لسهولة استرجاعا.
رابع شي: الحفظ كتابة مع القراءة بصوت عالي (بس مو ضروري نسمع أهل الحارة ويصيروا يحفظوا معنا) لنحفز عدة حواس للحفظ وهيك بتترسخ المعلومات بشكل أفضل.
خامس شي: ومرة تانية ما ننسى الرياضة البسيطة لتنشيط الدورة الدموية وتنشيط الذاكرة تبعنا.

السؤال الرابع: كيف بدنا نلحق المنهاج؟

يمكن يجينا وساوس ورسائل سلبية بتقول أنو ما رح نلحق نحفظ وانخلص كل المواد وهادا شي طبيعي، بس الواجب أنو نحنا ما نستسلم ونتركها تسيطر علينا ونطلع دائماً لانجازاتنا وقديش خلصنا من تحضير مواد خلال فتر الانقطاع ( راح الكتير وما بقي إلا القليل).
وطبعاً ما تنسوا اللجوء لله عز وجل بالدعاء بكل الأوقات لحتى تتيسر أموركون، لأن بالنهاية التوفيق من رب العالمين.
ونحنا بنقلكون إذا التزمنا بالخطوات السابقة وعطينا لكل مادة حقها ووقتها وحفظنا بشكل منيح ونظمنا وقتنا وأخدنا الراحة والنوم والتغذية الكافية رح نلحق إن شاء الله ونحقق هدفنا وننجح ونفرح وانفرح اللي حولينا.

مع تمنياتنا بالنجاح والتفوق لجميع الطلاب

إعداد عيوش رحمو


هل اعجبك الموضوع :

تعليقات

4 تعليقات
إرسال تعليق

إرسال تعليق

* نهتم بمشاركتنا رأيك في الموضوع

فقرات الموضوع